細細個撈電視汁,造就了證券新星誕生。莊志豪(Eric)讀中學時好迷《大時代》,難忘丁蟹在股票市場的恩怨情仇,誘發想「炒番鋪」的念頭。中學未畢業,他就與家人一起投資,可惜損手爛腳收場,數萬元化為烏有。小小苦楚等於激勵,「咪」財經版、財經電視節目,比補習社精讀班更有效。他終於明白了股壇搞乜鬼:「讀大學時炒股都贏幾多,但只係攞番當年輸嘅幾萬蚊!無着數!」
談人生計到盡
這位大學小股神,讀金融財務純粹誤打誤撞,Eric的大學選科本來是醫科:「成績唔夠入唔到,就轉揀工商管理!」從此,他開展了「計數人生」,不諱言也將人生計到盡:「學生時期要專心讀書,投身社會頭幾年,無家庭負擔可以轉吓工,搵份最啱嘅工,到三十歲買樓、有家庭……」
做證券公司之前,Eric分別是兩間銀行的出色員工,但他卻選擇跳槽再跳槽:「大銀行運作程序太多,拖慢做嘢進度,真係唔啱我。」他轉投仍在發展中的證券行:「依家做嘢無咁繁複,有建議可以直接向上級提出,發揮好啲!」才三十歲,已經連升兩次職,更定期接受傳媒訪問講貼士,成為「證券新星」。
Eric的工作需要時刻緊貼股市,每天全神貫注,眼明手快,幫人賺錢。他樂於接受緊湊的上班節奏,但真正最享受是優游生活:「香港純粹搵錢,每逢放假我都去旅行,無論係歐洲嘅大旅行,定係去上海嘅小旅行。」Eric老實說不喜歡留在香港,因為節奏太急促和空氣差。
愛優游棄應酬
休市、放工,也是離開緊湊生活的寶貴時刻。Eric明知應酬有助前途,但他有自己一套,為每日洗滌心靈,就放棄多如星宿的飲酒應酬:「我想返屋企食飯,想要私人時間!人生有得必有失,但我唔批評人哋用應酬去增加成功機會,每個人有選擇權。」
Eric突然靈機一觸:「最好搵夠就退休,寧願依家辛苦啲,最好五十歲退休!」他更有奇妙的念頭,就是拯救活於貧窮線下的天才:「香港、內地叻人好多,只因為窮而埋沒天賦就唔抵!」
莊志豪 小檔案
年齡:30歲
學歷:中大工商管理系,主修金融財務學
現職:致富證券資產管理部聯席董事
興趣:旅行