民政事務局副局長Florence許曉暉尋日以署理局長身份去維園出席「城市論壇」，同與會人士傾近排畀人鬧到爆嘅亞運會。硬食呢舊豬頭骨，呢次仲唔畀人玩死？Florence一坐低，「維園行動」其中一個成員已經開聲撩佢，話：「許副局長，你個樣點解仲後生過上任嘅時候嘅？」
一般女性遇到咁嘅情況都會好尷尬，豈料Florence從容不迫，用好溫柔嘅聲線撩番個後生仔：「咁我哋一陣間去飲嘢啦！」此話一出，即時搞到班憤青
嘩鬼叫，起初出口撩佢嘅青年都嚇呆咗。
論壇結束後，Florence冇放飛機，真係請晒現場二十幾三十個成員飲嘢。呢班憤青仲好似螞蟻見蜜糖咁，又要握手、又要合照，真係轉性。Florence臨走前答應班青年話一定會聽佢哋嘅意見。
Florence話唔擔心自己所做嘅會對其他副局政助造成壓力，因為大家都好樂意接觸市民，連社民連行委「維園阿哥」任亮憲都大讚佢講得出做得到，比起其他高官好得多，仲乘機反問唔肯出席「城市論壇」嘅建仔：「何懼之有？」臨走時，班年輕人仲係咁問Florence有冇facebook，話要做佢朋友，睇嚟真係畀佢電暈咗。