沙田馬場尋日舉行「仁濟盃」盛事，仁濟醫院一眾主席、總理齊撐場。名牌二手店米蘭站主席Byron姚君達啱啱進軍北京朝陽區，直接殺入內地賺人民幣，但撞啱近排美國總統奧巴馬催促人仔升值，佢直言萬萬不可，若果人仔好似外界咁講急升兩成，相信好多港商會執笠。
喺內地開製衣廠嘅仁濟總理黃志深同Byron一齊，佢一聽到人仔升值嘅話題都話好敏感，力撐總理溫家寶所講，如果人仔急升會有好多人失業。計佢話，若果每年升值百分之二至三，都仲係可以接受嘅。
有「翡翠王后」之稱嘅仁濟主席董吳玲玲亦盛裝現身，佢着咗件珊瑚色乾濕褸，襯白長褲同白色高踭鞋，手挽Hermes名牌手袋，輕便中帶貴氣。佢話自己平時好少買馬，但尋日知名商人何壽南愛駒出賽，何太曾任仁濟主席，依家仲係仁濟嘅永遠顧問，所以佢買咗二、三百蚊位置Q支持吓。