高太喺電台訪問度話，今個月十九號係佢同高教授結婚五十一周年紀念，乖巧識做嘅姨甥女特登買咗個好靚嘅芝士蛋糕返屋企同佢哋兩夫婦慶祝，仲喺個蛋糕度點咗一支蠟燭，話「五十又有一」喎。原來九月十九號仲係佢哋個女嘅生日，真係有雙重意義！

不過，原來高教授唔係咁熱衷於慶祝節日，例如情人節都唔會特別慶祝，高太話︰「佢話日日都咁開心，咁浪漫，日日都慶祝啦，點解要揀一日嚟慶祝？」今年中秋節，高錕夫婦同親戚食飯，簡簡單單咁過，但高教授似乎幾鍾意食月餅。高太話，高教授至愛食豆沙餡，仲一個人食咗半個月餅，搞到過完節肥咗四、五磅。