范上達同盧寵茂兩位教授都係香港嘅換肝權威，原來佢哋同樣好喜歡行山，多次參加樂施會毅行者。盧教授今年第三次參加，范教授仲犀利，今年行第八次。盧教授話最難忘嘅經驗係試過喺練習嗰陣，行行吓山收到醫院電話，話有人捐屍肝，拿拿聲要搵路出市區，好在都趕得切。
盧教授有時都幾牙擦，成日以為自己每次換肝要喺手術室閒閒地企足十幾二十個鐘都頂得順，行山一定好容易，○四年着住牛仔褲去第一次參賽練習，點知行到一半就腳軟，惟有乖乖地跟住隊友教嘅方法練習。
范教授喺呢十年嚟行咗七次，成績一次比一次好。佢話每次行到針山時，個個都攰到趴喺度，舊年天氣特別凍，個個凍到想快啲走，終於創下佢嗰隊嘅最快紀錄。又有一次，佢試過行到腳痛，連手帶都剪埋準備離隊，點知等唔到的士離開，抖咗一陣，發覺對腳已經冇乜事，執番條手帶繼續行程。
樂施會毅行者喺今年十一月十九號至二十一號舉行，由西貢北潭涌行去元朗大棠度假村，盧教授今年同囝囝「父子兵」上陣，而范教授就搵埋瑪麗換肝隊伍嘅夏威醫生組隊。兩位教授都認為參加毅行者唔只可強身健體，仲可以培養換肝手術最需要嘅團隊精神，係好難得嘅經驗。