電台撰文兼開記者會

潘醫生近期突然活躍，一向陰柔斯文嘅佢，轉性做咗街頭示威常客，係過去半個月，已經三次上街，好似十三號拍住「左派長毛」王國興，幫新巴車長出頭，要求運輸署同勞工處代表去勵德邨巴士總站視察，改善車長工作環境；之後又夥拍工聯會另一勞工界立法會代表葉偉明，遊行抗議東隧瘋狂加價；喺中秋節前夕，就踩上日本駐港總領事館，可謂頻頻撲撲，身水身汗。

尋日禮拜日，佢繼續為人氣工程努力，喺港台節目《給香港的信》撰文，再度反對東隧加價。咁都未夠，朝早仲開埋記者會，公布市民反對電車加價民調，慌死大家唔知佢有做嘢。東隧同電車加價，係交通運輸業問題，而工聯會喺立法會交通事務委員會只有兩個委員，就係王國興同葉偉明，點解要潘醫生操勞？意圖好明顯，佢想改善知名度唔夠嘅死穴，谷高人氣玩直選囉。

全部議題同交通有關

工聯會有不成文規定，勞工界代表唔設連任機制，即現任嘅葉偉明同潘醫生若要續任議員，一係轉戰直選，一係轉攻其他功能界別。葉偉明已立定心志轉戰新界東，潘醫生最近呢連串舉動，不停咁喺港島交通嘅問題鑽嚟鑽去，睇嚟佢想向外傳遞一個政治訊息，就係出戰港島心未死，仲想做多啲街頭運動，希望喺港島鑽出頭嚟！

不過，佢拎上手嘅議題，唔係同東隧、電車有關，就係幫巴士車長出頭，統統都同運輸業有關，小心傳錯訊息，令人以為佢想挑戰富貴黨主席劉健儀，轉戰航運交通界喎。