諾貝爾物理學獎得主「光纖之父」高錕近日返咗香港，同太太黃美芸一齊幫手推動防止老年癡呆症，佢哋將會留到十月中攞完大紫荊勳章先返美國，尋日高太黃美芸出席電台節目時透露，至今未同高錕講佢攞大紫荊勳章嘅事，唔知高太係想畀高錕有個驚喜？定係呢個勳章嚟得太遲，畀病魔折磨咁耐嘅高錕已經唔容易理解個勳章嘅意思呢？
高太喺電台節目中話，知道丈夫嘅病情會走下坡，佢亦做好咗心理準備。攞咗有五百萬港元獎金嘅諾貝爾獎後，對高錕嘅病情有正面幫助，不過，高太都話唔可以支持太耐，因為藥費好貴，今年中，高錕就因為新療程藥費太貴曾經停止服藥四、五個月，病情亦變差咗。
黃美芸仲話，今個月十九號係佢哋結婚五十一周年紀念。近期高錕胃口唔錯，肥咗三十五磅，加上留咗鬍鬚，遲啲可以扮埋聖誕老人。高錕童心未泯，應該會鍾意呢個角色。講到中文大學將會豎立高錕銅像以示紀念，高太話佢有兩個要求，就係希望個銅像唔好企得太直，同埋最好係「單手插褲袋」嘅造型，因為咁會有型啲喎。