甘老闆同朋友睇完舊樓後，就邊行邊講，沿蘭杜街、分域街，再橫過軒尼詩道，一直行到謝斐道間Spicy Fingers酒吧餐廳，揀選咗行人路旁嘅露天座位坐低飲嘢傾偈，期間煙不離手，抽完一支無耐，又再點第二支煙，好似好多嘢諗，唔怪得去餐廳途中，甘老闆特登走入便利店買定包煙傍身。

喺啱啱過去嘅中秋節，甘老闆點過呢﹖佢話同屋企人開開心心食咗餐飯過節，但問到同胞弟甘琨禮嘅訴訟及會否修好關係時，佢只係淡淡然話：「冇乜嘢啦，呢啲嘢慢慢嚟啦！」唔願多講。