台港關係好轉，區議會主席亦組團今日出發赴台訪問，呢個團名義上由屯門區議會主席劉皇發做領隊，實際卻係民政事務局局長曾德成以港台經濟文化合作協進會副主席身份做幕後領隊，雖然個團今日就飛過去，但德成局長同月前財爺鬍鬚曾訪台安排一樣懶神秘，參加嘅區議會主席都對四日三夜行程所知無幾。
據聞，呢個團早在今年六月，德成局長率領十八區區議會正、副主席去上海參觀世博期間已經有部署，當時主席們已被預告或以區議會名義訪問台灣。
幾日前，德成局長終於向主席們簡介訪台行程，話會考察當地社區、文化及體育設施，好似到台北參觀文山運動中心、華山一九一四創意文化園區及剝皮寮歷史街道、士林夜市等，去到台中，就會去孔廟及地震後重建嘅東勢鎮。
咁此行會見到乜嘢重量級台灣政治人物呢？德成局長冇講，班主席亦蒙在鼓裏。唔知係咪驚重演早前鬍鬚曾訪台，被行政院院長吳敦義放飛機一幕呢？呢個團原本籌劃區議會副主席都有份隨行，唔知點解最後卻冇份，好多人都話失望。