中大校長沈祖堯有沙士英雄之稱，尋日佢參觀醫學博物館一個關於助產士服務發展展覽時，講起當年喺港大醫學院讀第四年時，有八星期去贊育醫院做實習，曾經負責幫手替產婦接生做「執仔公」，喺佢眼中，呢八星期係佢讀醫生涯中最似醫生嘅時間。佢仲話，當時有助產士同佢講：「個媽咪係負責生，你係負責接住。」
佢記得當時喺醫院住，如果要幫手接生，實習生要即call即到，沈祖堯有一晚試過被「call爆機」，一晚之內幫手接生七個BB。又試過有產婦生完後向佢連聲多謝，當佢係接生醫生，相反只係對幫佢接生嘅女醫生講：「唔該呀，姑娘！」
第一次接生見到BB頭仔擰擰好得意，覺得好開心，亦試過接生大碼BB，稍有差池，BB同媽媽都有生命危險，真係險過剃頭。「執仔」咁有經驗，但沈祖堯話自己個女出生時，佢就冇為老婆接生，因為驚自己會緊張到跌晒啲手術架生落地喎，所以佢選擇喺老婆身邊默默打氣。