傳業界報復慣技

立法會出年年底就會搬去添馬艦新大樓，行政管理委員會近期密集式開會討論搬屋大計，好多議員都發揮「民以食為天」嘅精神，關注日後嘅餐廳，有見及此，行管會都要好認真咁成立個四人小組奉令揀飲擇食。據講，初步屬意飲食界嘅張宇人、識飲識食嘅白鴿黨李華明同建仔黃定光，再加開過麵檔嘅社民連黃毓民。呢個為食配搭好新奇，最好笑係有議員私下吱噚，話廿蚊張激㷫全城飲食界工人，驚同佢試食風險太大喎！

點解咁講？事關廿蚊張今年初拋出時薪二十蚊嘅建議後，全城打工仔都好憤慨，其中又以依家已經好低薪嘅飲食界為最，據講，勞工界議員曾經聽過業內發洩怒氣嘅做法，譬如神不知、鬼不覺「加料」，向無良老闆或者刁難之人還擊，所以議員好憂慮畀人知道試食嗰個係廿蚊張嘅話，會唔會畀人加料呢？口水、痰……嘩！真係諗吓都毛骨悚然呀！

新大樓物色飯堂

講番個小組，佢哋工作範圍好廣，要負責新議會大樓一切與議員飲食嘅問題，譬如設唔設立餐廳？天台cafe用乜嘢形式運作？議員飯堂有冇營辦商？由於好多議員都唔想好似家吓咁成日叫外賣，搞到逢禮拜三、有時連禮拜五都要食翻叮冷飯餸，希望第日有啲新鮮熱辣嘅嘢食，所以小組又要諗定如果搵營辦商嘅話，係揀西式、中式定係包羅萬有呢？總之瓣瓣顧全，冇得求其喇。

廿蚊張嘅強項係飲食業管理，又食慣好嘢，縱使因為最低工資辣㷫打工仔，但佢嘅經驗同為食本領都係立法會呢個小組嘅不二人選。口痕友仲話，立法會要揀嘅營辦商唔係一般餐廳仔，既要為本港行政、立法要人提供膳食，仲可能要款待外國議會或政要，餐廳水平同規管都要求好高，小組成員真係唔使驚噃。