尋日係中秋節翌日嘅公眾假期，好多政商界名人都入快活谷馬場湊熱鬧。場內遇到早前丁父憂嘅信興集團副主席David蒙德揚，見佢心情已經平復，佢話前晚一家人陪媽咪過中秋，晚飯後一齊食雪糕月餅同賞月，非常溫馨。每逢佳節倍思親，佢仍記掛住已故父親蒙民偉，所以趁尋日中秋「追月」慎終追遠，同家人去拜祭父親。
David尋日節目安排得密麻麻，晨早六點鐘先到運動場與一大班馬拉松愛好者練跑，一口氣跑咗十六公里，之後同家人前往拜祭父親，下晝再入馬場為朋友愛駒打氣。David舊年底曾經帶住旗下代理嘅Panasonic GF1相機（女朋友一號）入馬場，聽講新型號GF2快將面世，佢透露下個月將會過日本睇新相機樣辦喎！
場內仲見到醫管局主席胡定旭兩公婆同兒子為愛駒「心路」打氣，結果愛駒不負所望奪冠，並贏得二十八萬五千元獎金。肥胡兩公婆喺愛駒衝線一刻開心到振臂歡呼，而在旁嘅食物及衞生局常秘李淑儀亦高興得拍晒手掌，肥胡其後更與家人落場拉頭馬，太太就話夜晚會食飯慶祝。
「心路」出賽以嚟都未贏過頭馬，但自從暑假更換練馬師後，馬匹狀態回勇，今次仲跑出添，難怪肥胡兩公婆咁開心嘅。