立法會議員葉劉淑儀早前去咗北京、蘇州同無錫旅行，十日嘅旅程收穫豐富，除咗喺北京睇到佢好喜歡嘅京劇同越劇之外，喺蘇州仲欣賞到評彈同崑曲，可以講係一次戲曲之旅。
葉劉一向都鍾意中國戲曲，去到北京當然唔會錯過著名嘅京劇啦，佢今次就去咗北京嘅長安大劇院欣賞京劇《坐宮》同埋越劇《半把剪刀》。佢話兩套劇嘅演員都演得好好，其中《坐宮》更加係由年輕嘅京劇演員演出添。佢話此行冇機會欣賞到國家級京劇演員嘅演出，因為嗰啲「大角兒」（大牌演員）要喺中秋呢啲大時大節先會演出。
佢喺蘇州嘅蘇州工業園區月光碼頭月光書院裏面，亦欣賞到名聞遐邇嘅評彈同崑曲，呢間月光書院係新建嘅場地，今次佢得到一名蘇州朋友帶路先識得去，仲話日後有機會會再去多次喎！