24/09/2010

播放本新聞相關短片

政情:搞搞政:《十八仝人》佗衰家EQ捉蟲

建仔早前豪擲六十萬元同商台合作炮製嘅《十八仝人愛落區》,力捧黨內五名地區新星,最後畀廣播事務管理局裁定屬於政治廣告,要即時腰斬。據聞,建仔內部怨氣唔少,當中矛頭仲直指沙田區議員「EQ」葛珮帆。

EQ係立法會議員劉江華高徒,原來成個項目都係由佢拉線。據講當時中委會已經有人質疑花咁多錢買凌晨兩點到六點嘅電台時段,就算做行宣傳都冇乜成效,但喺EQ力說下,話會有精華片段喺朝早或中午時段播,所以唔會完全冇人知,最終中委會先有保留地通過。

咁怨氣點嚟?就係有啲地區人士睇唔過眼佢將成個節目搞到好似為自己度身訂造咁。通常節目嘅頭、尾場都較吸引公眾注意,加上有「80後」事先張揚會有狙擊行動,就更吸引公眾嘅眼球。EQ第一個做節目,一口氣做咗四集,攞盡頭彩,仲安排自己做埋最後一集,有人就唔滿意佢賺晒所有知名度,喺黨內惹起不滿。

呢次孭鑊,EQ除咗累咗個黨嘅名聲之外,仲得罪咗唔少地區樁腳,睇嚟將成為選超級區會議席嘅障礙。佢呢次真係捉蟲嘞!

不過,EQ就話同電台合作係一個新嘗試,凡係試新嘢都會有風險,加上呢個係黨嘅集體決定,唔信班手足會怪晒佢。唔知事實有冇EQ諗得咁美好呢?

Money18 新功能「18好路數」為你預測心水股票升跌機會率