四十八年前透過國際培幼會（契爺會）獲受助兩年嘅立法會會計界議員「波波」陳茂波，最近成功搵到當年助養佢嘅美軍中尉契爺Mr.Bruce，上月波波兩公婆同囡囡遠道飛往美國華盛頓同契爺首次見面，大家見面一刻恍如隔世，激動相擁，場面感人。
大家除咗暢談幾十年來嘅經歷外，契爺同契媽又帶佢一家到附近遊玩，大家都好享受三天嘅相處。為答謝契爺同契媽嘅恩德，波波特別送咗兩份禮物畀佢哋，一份係頸巾，另一份係中國仿清朝花樽。
波波獲受助嗰年只得六歲，住喺石峽尾木屋區，後來搬到廉租屋，生活改善後就停止受助。至於佢契爺點解會助養香港小朋友，原來係有次喺報紙睇到每月七元就可以助養一位小朋友，於是決定助養一位中國小朋友，但當時國際培幼會嘅助養計劃唔涵蓋中國，最後就選中咗住喺香港嘅波波。