改革派裏外不是人

早前分析過，白鴿黨喺嚟緊嘅立法會選舉打算採用「n+2」策略，除咗保住原本劉慧卿、黃成智同攞埋已退黨嘅鄭家富嗰個席位，再力爭新東新加嘅一個議席。多咗兩個位，理論上無論係分拆名單定排第二名，都多咗好多機會出選，但呢啲機會Gary通通冇份。

心水清嘅人就睇得穿，Gary冇乜可能可以喺卿姐同成智嘅名單上出現。成智係白鴿黨主流派嘅中堅分子，同改革派牙齒印甚深，要佢幫Gary一把簡直係天方夜譚；而卿姐之前喺前綫亦帶咗唔少猛將過檔，個個都等緊機會上位，點都會照顧咗自己人先。

咁即係話黨內嘅大佬、大姐都唔會睇Gary喇！想自己一張名單突圍而出咩？以改革派嘅勢力，好難獨力而行，再加上Gary有一排曾經想「洗底」同改革派保持距離，最終又不了了之，已令佢夾喺改革派同主流派中間，裏外不是人，要得到各個地區樁腳嘅支持就難上加難。

做召集人未必有利

之不過，佢做咗民陣嘅召集人後，嚟緊一年都可以增加曝光率，對一二年嘅選戰必然會有利啲。但係咪真係有幫助呢？好似○三年民陣成功發動五十萬人上街咁，紅到連外國傳媒都爭住報道，但當時嘅召集人蔡耀昌都係冇跑出，證明民陣呢個跳板並唔係一定有效；加上民陣為保持中立形象，從來都唔會支持任何人做參選，所以Gary嘅如意算盤都未必咁易打得響。

我哋呢幾日一直都聯絡唔到Gary，但佢就曾經話過只係關注政府重推《基本法》第二十三條立法先做民陣召集人，但係咪真係咁單純，真係得佢自己一個至知嘞！