股壇靚女多，近期彈起的是年僅二十五歲的「股壇小甜心」李韻儀。她是時富資產管理策略師，也是全港最年輕股評人，男Fans一大籮。青春是最大本錢，但難免令人覺得她未夠班，她惟有加倍努力，證明自己有料。
樣子甜到漏的李韻儀（Sonija）是全港最年輕股評人，除上電視和電台講股，又在報章寫專欄：「最唔慣係上電視，初時連鏡頭喺邊都唔知，試過一次做live，電話線路有問題，聽唔到聽眾問乜，好彩記者提番，總算過到關！」
目標30歲後買樓結婚
Sonija○七年港大經濟及金融系畢業，自小已有投資天分，中學時期最愛買金，升上大學後狂抽新股。時富是她第一份工，最初做財經分析員，去年初出鏡做股評人，她否認靚女才被選中：「公司想搵新面孔，吸納多啲後生客啫。」她手頭上的客戶全是三十餘歲的後生仔：「年輕人啱傾啲。」
青春無敵，但是否有料才是實際。Sonija承認不夠資深，惟有勤力補救：「我會花好多時間睇資料、睇公司background，根本冇收工時間，試過去旅行，夜晚返到酒店，第一時間就係睇Bloomberg！」
拒做花瓶，Sonija自知仍有很大進步空間：「同資深股評人比，睇嘢真係唔夠佢哋廣，惟有努力做足功課。客人有得賺，自然對我有信心！」
為免被人問到口啞啞，每次講股，她都做足準備：「我會睇當日市況同近期焦點，再決定講乜。」最令她引以為傲的，是去年以兩元買入中渝置地（01224），短時間內升至六元，證明眼光獨到。
股海瞬息萬變，正是這點吸引她入行，她笑說：「我鍾意多元化，大學時Finance成績亦好好。」她希望事業發展更上層樓：「未來目標係管理多啲客，三十歲後買樓結婚！」
Sonija's Profile
李韻儀小檔案
年 齡：25歲
學 歷：香港大學經濟及金融系
現 職：時富資產管理策略師
興 趣：紫微斗數、爵士舞、運動