香港才女多，專門協助弱勢婦女嘅慈善機構「心話」，前晚舉行第一屆慈善晚宴，表揚八位成功年輕女企業家。大家樂主席陳裕光嘅千金陳浩寧（Candice）、中策集團主席馬時亨千金馬露明（Christine）、富豪趙世光女兒趙式和（Jane），以及足總董事余錦基千金余詠君（Wendy）都分別獲獎。
二十六歲嘅Candice係爸爸嘅掌上明珠，陳裕光拉埋太太同囝囝浩弘為囡囡打氣。Candice喺紐約讀室內設計，返港後唔打家族工，開設計師樓闖天下。雖然家族旗下嘅大家樂、利華超級三文治都搵佢搞設計，但Candice憑實力，吸引零食物語同多間連鎖飲食集團搵上門。Candice話，爸爸從小拉佢一齊行地盤，喺沙塵滾滾嘅工地上構建新餐廳，或者呢個就係陳裕光特訓女兒嘅方法啩。
另一個得獎者係肥亨嘅乖女Christine，佢開辦德育學校JEMS，以遊戲同活動向小朋友灌輸道德教育，獲頒教育企業家獎。Christine認為道德教育係無價寶，創新思維漸獲新一代家長認同，難怪報讀學校人數爆晒燈。