近排加風四起，電車、小巴、巴士、的士個個都開聲嗌加價，偏偏呢個時候，政府宣布交通諮詢委員會啱啱夠期換主席，已經做咗六年嘅資深大律師鄭若驊交棒，接任者係大律師公會前主席袁國強，任期兩年，下月一號正式上任。
雖然交諮會只係一個諮詢組織，喺交通工具同隧道加價問題上並冇話事權，甚至成日畀人質疑係政府嘅橡皮圖章，但家吓周圍都係瘋狂加價之聲，袁國強要做嘅工作真係吃力未必討好，話佢係接燙手山芋都冇錯㗎，睇嚟佢要做足功課，否則隨時成為箭靶。
講開又講，政府最近愈嚟愈鍾意委任啲形象相對中立嘅專業人士，擔任重要委員會嘅掌舵人，除咗鄭若驊同袁國強之外，仲有獨立監察警方處理投訴委員會嘅主席翟紹唐。佢哋三個都係資深大律師出身，亦冇明顯嘅建制、泛民或工商界背景，由佢哋主理交諮會、臨資會同監警會呢類比較敏感、又同基層市民息息相關嘅委員會比較恰當。