本文重點
高官名人圈有通波仔經歷嘅比比皆是，最新一個係鄉議局副主席兼大埔區議會主席張學明。呢個月四號，學明出席一個鄉村環保活動時仲好精神，但據聞第日佢忽然嘔吐，初頭以為食錯嘢，詳細檢查後至發現心臟大動脈血管栓塞，醫生建議即時同佢「通波仔」。
已休養個幾禮拜
手術之後，學明個幾禮拜前已經出院返屋企休養，期間，佢取消晒所有公開活動，就連前日嘅鄉議局執委會都冇出席主持會議。嚟緊嘅禮拜日，十八區區議會主席有個四日三夜嘅台北同台中團，今次仲係首次以十八區區議會主席名義訪台，學明身體未復原，預料只有十七位主席成行。
心血管病係香港嘅第二號殺手，學明嘅立法會同事「大舊石」石禮謙，過去九年嚟就六度通波仔，不過大舊石身形肥大，又鍾意食好嘢飲靚酒，佢有呢類毛病唔算出奇。學明身材中等，肥一定冇佢份，平時佢又經常踩落鄉村，運動量應該十足㗎，竟然都會患上心血管病，可見呢隻病真係唔可以輕視。