立法會新大樓仲未起好，但已定於下年年尾搬竇，好多準備工夫都已經靜雞雞進行。立法會秘書處尋日發出公告，通知議員可以就新大樓地址名稱畀意見，建議有「立法會道1號」同「議會道1號」，同時亦歡迎議員發揮創意諗啲新街名，總結後再交畀政府做公眾諮詢。
新大樓對出嘅一條路同現有嘅添美道同龍匯道相連，本來可以簡單啲跟呢兩條街名，譬如叫「添美道×號」或「龍匯道×號」，不過早前問過發現唔少議員都唔鍾意，覺得龍匯道個名太難記，添美道就更加會畀人無端端添多咗條尾巴嘅意思。
結果議員要構思新街名，有議員話貪議會道或立法會道易記，一提起實識去。如果係咁，佢哋真係太睇小的士司機喇，依家大把乘客冇講街名，的士司機咪一樣送到佢哋去立法會門口！