中秋節適逢國際無車日，司局級高官尋日齊齊響應，有人行路返工，有人搭港鐵、巴士，或者夾份搭的士，一於做騷冇落伍。政府總部位處中環，搭港鐵幾乎係中環打工仔首選嘅交通工具，尋日最少有三個局長搭港鐵，但只有環境局局長邱騰華早早call定傳媒，結果順利搶咗風頭。啲高官雖然大演慳家本領，但環保團體都批評，高官一年先做一次騷，靠佢哋減碳救地球就弊囉！
冇得搭政府座駕
既然係國際無車日，高官尋日返工都唔可以搭政府提供嘅輝騰或寶馬座駕，結果要好似八仙過海咁，各有各諗橋。住得近嘅，行路返工係最佳選擇，仲可以笑騎騎咁上吓鏡，話畀人聽佢幾環保；住喺山上嘅，就選擇兩個人夾份搭的士，幾十蚊車費兩份分，分分鐘平過住喺天水圍嘅打工仔出中環。
冇咁近嘅又點呢？邱騰華、保安局局長李少光同運輸及房屋局局長鄭汝樺（Eva）都係搭港鐵返工，不過，光哥同Eva冇事先張揚，係得邱騰華搭港鐵去立法會畀人直擊全程。其他如教育局局長孫明揚，就揀咗搭巴士。
綠色和平：唔夠喉
勞工及福利局局長張建宗同財經事務及庫務局局長陳家強就齊齊搭屋苑嘅邨巴，呢類邨巴一般都係由屋苑接駁去地鐵站或大型購物中心附近，佢哋兩個落車後應該要行一段路先返到政府總部。前特首辦公室主任、現任金管局總裁陳德霖都有響應無車日，食晏晝時，就見佢步行來回辦公室同香港會。
啲高官棄車為環保當然值得鼓勵，但綠色和平項目主任古偉牧就認為，佢哋只係做一日騷太唔足夠，最好「天天都是無車日」。