曬得一身古銅色的阿放，天生愛玩，行山、打波、划獨木舟無一不喜歡，更結識一大堆朋友，與他明年結婚的女朋友都是透過朋友重聚而譜出愛歌。他認為：「愈多人玩愈開心！喜慶日子會同成三十多位朋友一齊出嚟玩！」而在平安夜出世的阿放，「生日時到處都在慶祝」，收禮物收到「手軟」，因而特別喜愛熱鬧和節日氣氛。
生日孭櫈上山送贈好友
不過，平日愛花心思逗人喜歡的阿放，又怎會甘心年年當壽星仔時禮物只收不送。於是，有一年平安夜，他決定搞搞新意思，與老友行山慶祝自己生日時，竟帶備鐵櫈仔作生日回禮。他說：「當時我嗰四十個同我行山嘅老友，都鍾意行山嘅，送行山用嘅鐵櫈仔就最好不過。」於是，他竟然一個人靜靜地將四十張鐵櫈仔放在背囊孭上山。「個背囊都有成米長，行緊時，啲朋友問我個袋做咩咁大。我唔答佢哋，直至上到山頂，一張張送出去，佢哋不知幾開心！」
阿放排行第二，有一個大一歲的哥哥以及年輕十一年的妹妹，他愛逗人開心的性格令家裏充滿歡樂，「哥哥同我都鍾意畫畫，好夾！喺屋企都係我哋一齊搞氣氛，同妹妹嘅感情好好㗎！依家每個月我都會約佢哋出來聚吓！」除了朋友家人，阿放更喜歡以綵燈與眾同樂。
展場當神秘人收集意見
「綵燈有節日氣氛，又可以將自己喜歡嘅東西，加喺設計中與人分享嘛。」當了綵燈設計師七年，亦會設計聖誕燈飾。阿放認為分享最大的回報，就是得到別人的共鳴，亦是他衡量成功的標準。他說：「綵燈設計好唔好，一開展就會知道。因為綵燈一做得唔好，就會似紙紮品，真係會嚇走晒啲人，相反靚嘅就會聚到人群。見到啲人話靚、話鍾意嗰時，你自然會好滿足，好有成功感。」
所以，阿放很緊張他的作品得不得到大眾的共鳴。他曾試過日日到展場當起神秘人，跟街坊「打牙骹」，聽聽意見。今年中秋夜賞燈之時，當有一個架着粗框眼鏡、黑黑實實的大男孩跟你搭訕時，說不定便是阿放。
鄧崇放Leo小檔案
年齡：37歲
興趣：打籃球、行山、划獨木舟
現職：綵燈設計師
學歷：大一設計學院畢業
曾獲獎項：
2007東鐵車廂設計得獎作品、2005香港安全標誌文件套封面設計比賽公開組亞軍
花燈展覽（部分）﹕
2010
維園《月下藝萃頌昇平》、尖沙咀文化中心《香江歲月狂想曲》及西九龍海濱長廊《月滿西九》中秋綵燈展；尖沙咀文化中心《東滿人間福滿門》新春綵燈展
2009
尖沙咀文化中心《東亞攜手創傳奇》、西九龍海濱長廊《花月慶中秋》中秋綵燈展
2008
尖沙咀文化中心《神鵰俠侶．射鵰英雄》及《繽紛水世界》中秋綵燈展