富貴黨主席Miriam劉健儀應邀出席一個網台節目，做主持嘅白鴿黨副主席劉慧卿問起外界都話富貴黨好富貴，點知Miriam話家家有本難唸的經，仲話黨內係有好多專業人士，但富貴嘅只係前主席田北俊一個，仲叫卿姐得P:閒資助吓富貴黨添！

吓！Miriam咁講，即係怨田少累個黨令人產生錯覺啫！老實講，富貴黨好少呻窮，反而白鴿黨不嬲呻窮到燶，但自從佢哋喺政改方案轉軚後，籌款反而豬籠入水，Miriam依家掉轉頭向卿姐挖錢都唔知係褒定貶。

另外，Miriam又提及搵人交會費入黨唔難，但要佢哋參與會務就唔係個個肯，仲形容入黨好似結婚一樣，好難搵到合拍伴侶。卿姐好認同，仲對富貴黨招募黨員嘅程序好有興趣，問Miriam點揀會員。點知Miriam好鬼馬，唔漏口風之餘，仲叫卿姐申請入黨體會吓，搞到卿姐口啞啞。最後Miriam打圓場，話明白呢個要求難咗啲，因為大家都「唔可以嫁兩次」喎！