肥亨笑稱，周文耀開證券戶口要簽成吋厚文件，足足搞咗兩粒鐘，證明銀行生意難做，以前一個職員做十單生意，依家就做得一單。不過，佢話好彩香港逐步向人民幣離岸結算中心邁進，而人民幣產品愈嚟愈多，充滿機遇，好似佢年初同傳媒聚會時提議大家買人民幣債券，估計今年有百分之六升幅，至目前匯價同債券價格升幅已將近達標。

百分之六回報或者唔算高，但肥亨話呢門投資風險唔大，回報算唔錯。點睇日圓升至歷史性新高呢？佢話唔敢掂外匯，一來風險大，二來冇咁多時間睇住個市喎！