眾所周知，英國萬人迷球星碧咸同佢個辣妹太太Victoria嘅衣着，永遠走喺時代尖端，碧咸嫂早前以自己大名Victoria Beckham出時裝，設計腰位特幼嘅晚裝，名媛Olivia李桂蘭都忍唔住飛去英國入貨。
早前喺一個名人Ball就見到Olivia着咗條Victoria Beckham淺啡色斜肩華麗Cocktail Dress，價值數萬港元，輕易艷壓全場，原來佢專登飛去歐洲入貨， 包保唔會同人撞衫。碧咸嫂天生葫蘆身材，恨死隔籬，估唔到佢嘅設計都照copy自己三圍，腰位幼到不得了，連只有二十五吋腰嘅Olivia都高呼「着唔落」，要搵裁縫師傅放裙，認真貪靚。
Olivia當晚仲戴上閃爆嘅瑞士頂級珠寶Adler鑽石錶。係咪先生送贈嘅禮物？佢甜絲絲咁話：「梗係啦，（隻錶）咁貴，我邊度買得起。」