新界鄉議局執委會尋日其中一項議程都同殺校有關，事關大埔官立中學殺校，要併入新界鄉議局大埔區中學，本來合併後校名會維持不變，但議程就討論係咪要加入「官立」兩個字，若果通過嘅話，咁合併後嘅校名就改為新界鄉議局大埔區官立中學。

教學質素最緊要

主席劉皇發有感而發，話加入「官立」呢兩個字係咪有重大好處？可以攞嚟擋煞？如果呢個字有咁大能力嘅話，咁咪加番「官立」囉！跟住佢仲贈多句，話鄉議局喺元朗嗰間中學，就算冇「官立」兩個字，都係Band 1學校，好多人報讀吖！佢又話最重要係校董會搞好間學校，振奮啲教職員，等學生得到好嘅教學質素。

聽完頭嗰幾句，都覺得發叔唔多鍾意「官立」呢兩個字，當佢講到「擋煞」就會覺得佢係咪信風水。其實邊係吖，無論佢講嘅係「擋煞」定係「擋殺」，意思都係一樣，事關官立中學係政府揸旗嘅，若有乜郁，政府話要縮班殺校，一定冇得拖，根本就係行先死先，改名做鄉議局大埔區官立中學後，點可能擋得住政府呢個煞星？亦可能逃唔過殺校命運。

咁唔老利，發叔當然抗拒啦！跟住聽埋佢提及鄉議局喺元朗間中學，態度就更加明顯嘞！多人讀係靠實力，唔使靠「官立」嘅！

皇氣太重損形象

其實，在場個別執委都認為應該加入「官立」兩個字，話咁就變成大埔區唯一嘅官立中學，啲家長會有信心啲。隨即又有另一個執委舉咗一連串例子，話大埔官中執笠、沙頭角官中又執笠，而有啲家長亦對上水官中嘅印象唔多好，若果大埔呢間中學加入「官立」，擔心會畀人覺得官方「皇氣」太重，影響學校形象喎。