香港城市大學尋日頒授榮譽院士，雖然遇啱颱風「凡亞比」襲港，但仍有唔少政商界名人嚟撐場。四位榮譽院士當中，以中港照相器材集團主席Dennis孫大倫最威水，除咗太太拉大隊祝賀，親家康文署副署長鍾嶺海同身為旅遊事務助理專員嘅太太鍾麥雪梅都一齊嚟捧場。
Dennis近排可謂喜事連連，事關上個月佢啱啱同富貴黨常委田北辰、偉易達主席黃子欣等城中名人齊過六十歲大壽，依家又首次獲得本港大學頒授榮譽院士頭銜。尋日大仔因離港工作冇嚟到，新抱仔Jacqueline就同奶奶等現身撐場，新抱嘅一對高官父母亦齊到賀。
今次獲得榮譽院士嘅傑出人士仲有拔萃女書院校長劉靳麗娟、新科實業（香港）主席梁少康同突破機構總幹事梁永泰。咁開心嘅時刻梗唔少得家人嘅支持，除咗Dennis之外，劉太嘅家人都扶老攜幼嚟見證呢一刻。