考評局主席吳克儉話，張永明今年三月提出為咗優先照顧家庭，所以決定唔再續任秘書長，又話：「大家為咗呢件事好煩躁，用咗幾個月時間游說張博士，但我哋會尊重佢因對家庭嘅承諾而作出嘅決定。」

考評局已成立秘書長遴選委員會同委託全球頂尖嘅顧問公司，開始就秘書長一職進行全球招聘，現已展開收集名單嘅階段，今日將會開第三次會議。吳克儉話考評局董事會要求秘書長繼任人要有領導才能同熟悉本港情況，但冇限定要係香港人，估計獵頭工作會喺兩至三個月內完成。

教育局局長孫明揚對於張永明決定約滿後唔繼續留任表示惋惜，仲讚揚張永明任職考評局期間表現傑出，祝願佢日後生活愉快。