政府今日將公布申辦亞運嘅諮詢文件，身兼臨時申辦委員會副主席嘅港協暨奧委會會長霍震霆，尋日出席酒會時畀傳媒「圍攻」，佢即時借全國人大常委范徐麗泰甩身，當記者問佢近排忙緊乜嘢時，佢竟然九唔搭八咁爆咗句：「啱啱同范太講咗聲生日快樂囉。」成功轉移視線到范太身上。
雖則畀霍公子過橋，但尋日牛一嘅范太心情大好，仲特登恤咗個靚髮添。不過佢就大呻天公不作美，希望天晴時可以補番佢嘅「三老遊」，即係同佢奶奶、姑仔一齊暢遊海洋公園。佢又話自己六十五歲嘅生日願望，係全部人都開心快樂，「乜嘢都假，身體健康最重要！」
講番轉頭，雖則霍公子一度甩身，但講到尾申辦亞運咁大件事，傳媒又點會放過佢？結果記者追訪完范太後，跟住再對霍公子窮追猛打。