本文重點
政改方案已通過咗兩個幾月，但至今仍有人追住白鴿黨就轉軚一事算帳。近日前電台主持快必、慢必、社運人士「星屑醫生」歐陽英傑同前港姐袁彌明等人成立咗「選民力量」，組織旨在破壞依家泛民嘅大佬文化同協調機制，仲希望喺呢兩個月內吸納至少四十名會員，計劃喺嚟緊區選傾巢落區，話就話想畀選民多一個選擇，查實就係要狙擊白鴿黨。
強調未投過票畀白鴿黨
極有可能「落中西，撼甘威」嘅袁彌明，出名寸嘴，鬧盡賤男港女，早前佢更試過扮裸體衝上政府總部抗議。佢尋日自爆不嬲都有興趣從政，只係搵唔啱一個適合嘅政黨，又強調自己從未投過票畀「出賣民主」嘅白鴿黨：「對於所有冇誠信嘅人我都杯葛㗎，娛樂圈有啲女星整完容又唔認嘅，我一定照鬧！」
甘威上年受「女助理好感」事件困擾，如果袁彌明狙擊佢嘅話，到時肯定畀人執住單醜聞嚟打，都咪話唔甘囉！但袁彌明大呻雖然自己知名度較高，但因為形象負面，未必有利選情，仲擔心涉足政治會令佢更難接Job添！
選民力量來勢洶洶，白鴿黨主席鐵頭仁暗批佢哋嘅行徑同建制派無異，又話：「以前選舉時都有左派出嚟扮民主派參選，目的就係想
票，選民力量咁做同佢哋冇乜分別啫。」