Moiselle慕詩國際主席Boby陳欽杰，潮流觸覺時刻保持敏銳。早前喺慕詩股東周年大會上，見佢打扮得官仔骨骨，佢笑笑口咁話出席咁正式嘅場合，梗要執到正啦！
男士嘅正裝通常係黑、藍、灰為主，Boby貴為上市公司主席，平時着衫除咗要追款之外，都要保持莊重形象，所以揀色唔會太花巧。當日佢着住嘅法國品牌Givenchy西裝都係黑色，但啱身嘅剪裁就盡顯設計心思。
佢一向係意大利品牌D&G嘅擁躉，貪佢夠時尚，設計又啱心意，當日佢就揀咗條D&G藍色絲質靚呔，屬穩陣之選。記者問佢慕詩有冇打算做埋男裝，曾經呻過話男人錢難搵嘅Boby都係冇心撈過界，話：「有機會先啦！」
