由四個地產代理商會組成嘅大聯盟尋日發起遊行，總共有成二百幾個地產代理參加，佢哋要求擴大業界喺政制上嘅參與，事關佢哋依家喺立法會同選特首嘅選舉委員會都「no say」。除咗富貴黨主席Miriam劉健儀外，富貴黨中常委「田二少」田北辰同區議員「哪吒」方國珊都有出席撐場，可謂陣容鼎盛。
Miriam冇參加遊行，但佢喺出發前為大隊打氣話，雖然政改方案已經否定咗喺立法會增設地產代理界別嘅可能，不過下屆選舉委員會由八百人增至一千二百人，政府絕對應該亦絕對有空間喺新增加嘅四百人中，撥一啲畀地產代理業界。
政圈吹行風唔擴界別
聽完Miriam嘅慷慨陳詞，唔少參加遊行嘅地產代理情緒即時激昂起嚟。跟住發言嘅田二少大讚地產代理喺中小企中屬代表性行業，呼籲大家要團結，情緒升至高溫嘅遊行隊伍更不斷叫好，然後操上政府總部。
炒到咁熱做乜吖，最後希望可能變成失望。事關政改方案本地立法問題未解決，新增嘅四百個選委議席係各界角力嘅場地之一，之前已經有勞工界希望向漁農界開刀，要求漁農界議席加少啲，讓路畀勞工界翻一番嘅爭議。
政圈亦吹行風話政府唔會再擴大選委會嘅界別成分，以免分得唔勻。正所謂僧多粥少，加設新界別隨時惹嚟其他界別眼紅或不滿，所以特區政府先至傾向不變應萬變。
湯家驊想選超級議席
政治係妥協嘅藝術，本住明知不可為而為之嘅勇氣可能會碰到灰頭土臉。今次Miriam、田二少同哪吒咁落力幫地產代理界發聲，最後可能落得「三傻」撼頭埋牆嘅下場。地產代理界別有三萬幾人，莫非富貴黨嘅如意算盤係藉此爭取佢哋嘅支持，將來留待選舉時發揮效用？
尋日有消息傳出，話公文袋嘅立法會議員湯家驊有意出選西貢區議會嘅日出康城選區，挑戰一早就喺嗰區經營嘅哪吒，如果係真，佢選區議會超級議席嘅動機就好明顯。哪吒就提醒居民：「小心啲人追女仔，追到其實又吼住另外一樣嘢。」