三十九歲的明德豐（Sherwin），這天駕着他的《頭文字D》戰車拍照，AE86一出，迅即吸引途人目光。他言若有憾：「前幾年仲誇張，揸親呢架車，都畀人追住影，搞到朋友唔肯坐我車！」

明德豐熱愛電影，除了搜羅跟電影《頭文字D》主角戰車一模一樣的豐田AE86外，更不惜「拋頭露面」做特約演員。記者一時說錯他是「臨記」，他即糾正：「我係特約，有戲份、有對白，臨記冇㗎！」他最近在電視劇《公主嫁到》演藥材店老闆，跟阮兆祥有對手戲：「我覺得自己幾適合演喜劇，朋友睇到都話搞笑！」

《潛行凶間》近期至愛

他九八年開始做特約，至今已演過數十套電影和電視劇：「當時我讀導演會課程，識咗一班導演朋友，有戲開就預埋我。呢排最難忘係同劉青雲拍《撲克王》，我做佢助手，成個月不斷來回澳門，又要過夜。」

他的闊少身份，連劉青雲也開玩笑說要跟他搵食，但他強調拍戲沒優待：「都係同大家一樣食飯盒，有時等成日都未拍到我，都要等㗎。」

醉心電影，可說與父親有關：「阿爸鍾意睇西片，細個成日跟佢睇戲，我就乜嘢戲都睇，連汁都撈埋，《英雄本色》睇咗好多次，對白都識背！」最近他極愛《潛行凶間》，反過來雀躍問記者：「你認為男主角係咪返番現實呀？我覺得係囉。」

太太反對 父親支持

他對演藝事業有着一份執着，無奈家人並不欣賞：「屋企人覺得我好怪，成日叫我正經啲，太太又叫我唔好搞咁多嘢。」倒是父親最支持他：「佢每次喺電視見到我，都會打電話畀我，又成日喺啲uncle面前，叫佢哋搵我拍戲。不過自己知自己事，要人出錢喎，唔好搞啦。」

Sherwin夢想是擁有一部自編自導自演的作品，最近他為「東區MONTAGE獨立電影節」拍宣傳片，算是踏出第一步：「屋企人以為我想做明星，其實我只係好享受拍攝過程，有諗過開電影公司，但覺得未夠經驗。做人最緊要開心，我唔會放棄理想！」

明德豐Sherwin小檔案

年　齡：39歲

學　歷：美國加州理工大學酒店管理學士

現　職：金漢旅遊有限公司助理總經理

　　　　進興發展有限公司執行董事

　　　　特約演員

興　趣：演戲

曾參演電影（部分）：《喜劇之王》、《特務迷城》、《大搜查之女》、《撲克王》、《家有囍事2009》、《飛砂風中轉》