根據公、社兩黨嘅如意算盤，等帳委會完成手頭嘅報告，替工就會辭職轉人，之但係唔少泛民主派中人都收到風，話如果再由袋巾傑同毓民選帳委會，建制派一定搵人出嚟爭，即係想封佢哋道「旋轉門」。帳委會委員全部都要經內務委員會投票大多數贊成通過，以依家立法會嘅勢力分布，一有競爭，分分鐘泛民代表驟減，所以泛民惟有按兵不動，睇吓有冇機會扭轉劣勢，如果十月復會都搞唔掂，惟有由兩個替工一路做埋落去。

到底「公投」兩子有冇行呢？帳委會主席「IQ博士」黃宜弘就打晒開口牌，話當日做替工嘅議員接受任命時，係應承一路做到尾，唔係做半年又收檔，如果忽然又話要辭職畀番舊人做，肯定會有人唔高興。