潘潔最近使咗萬幾蚊喺屋企裝咗個太陽能熱水爐，仲成日同人講起呢件事，兼提供埋圖片畀我哋。由相片睇嚟，個圓筒形熱水爐儲水量應該足夠四、五個人沖涼。

佢話咁做係為咗響應低碳生活。原本佢屋企一個月要用三罐石油氣，依家只需一罐就搞掂，每個月慳番五百幾蚊，所以部熱水爐雖然要萬幾蚊，約莫兩年就可以回本。

聽落呢個環保行動好似幾跟得過，但係由於個爐要裝喺屋頂吸收太陽能，所以唔係有心就做得環保戰士㗎，住喺普通大廈或者公屋嘅廣大市民就唔得嘞。