後日就係中秋節，建仔嘅立法會議員陳克勤尋日話，小時候中秋最鍾意同朋友仔匿喺後樓梯煲蠟。吓！玩煲蠟咁危險？克勤仔解釋，細個屋企環境唔係咁好，即使中秋節都唔會特別慶祝，所以最多都係同朋友玩煲蠟。雖然煲蠟係唔啱，但克勤仔細個都算玩得有品，煲完之後會小心清理地方，唔會搞到周圍一撻撻。嘩！有手尾同乾淨固然好，但佢冇提到煲蠟會搶火，隨時燒爛面㗎！
話口未完，克勤仔就話因為家庭環境唔好，所以會將煲完嘅蠟剷起再玩多幾次，直至完全玩唔到為止。佢仲寄語小朋友，以前因為物質冇咁豐富，冇得選擇下先會煲蠟，既然依家咁多嘢玩，都係盡量唔好玩呢種危險遊戲。啊！咁都好啲，總之無論大人定係小朋友，千祈唔好貪玩煲蠟呀！
克勤仔呢排真係忙到暈，除咗要喺自己地頭新界東派發工作報告畀選民外，嚟緊仲要出席多個地區慶中秋活動，最忙要一晚走六場添，都咪話唔辛苦。但幸好中秋節有時間同家人食餐飯，之前幾辛苦都冇所謂啦！