香港醫學組織聯會尋晚舉行籌款音樂會，請嚟多位著名演奏家，將《梁祝》協奏曲演繹到出神入化嘅西崎崇子都有份表演首本名曲，琴聲繞樑三日，令人聽出耳油。而食物及衞生局副局長梁卓偉亦為慈善露兩手，演奏匈牙利舞曲，仲為另一位醫生伴奏，彈奏一曲《You Raise Me Up》，全場掌聲雷動。
四歲就學鋼琴同指揮嘅梁卓偉，音樂細胞十足，媽媽喺政府學校教音樂，耳濡目染下，佢嘅音樂造詣有番咁上下，尋日為一位醫生伴奏三首樂曲，自己再彈多幾首歌。佢話信心十足，事前亦只係約略綵排吓，睇嚟佢第日唔做官，變身演奏家都一定搵到飯食。
大會曾傳出消息，話有份治療Jason梁頌學嘅屯門醫院腦外科部門主管方道生醫生有份上台唱歌，方醫生嚟到卻坐喺台下，佢笑騎騎話：「我邊有份（上台），我都唔識。」莫非係畀人擺上枱？不過方醫生都鍾意聽古典音樂，佢話唔同曲目總有觸動人心之處，冇話特別鍾情某位音樂家。
方醫生係鐵人，中秋節都唔放假，佢話有班東南亞腦科醫生過兩日嚟香港交流，要做東道主招呼賓客喎。