闊別香港七個月的諾貝爾物理學獎得主高錕同太太黃美芸，最近由美國返咗嚟，預備出席聽日舉行的「高錕慈善基金」成立典禮。高氏伉儷原本答應會出席尋日舉行嘅「百人壁畫」商場活動，順便祝賀香港老年癡呆症協會成立十五周年大日子，點知最後只有高太「單刀赴會」，搞到好多想一睹高教授風采嘅市民失望不已。
高太代夫解釋，話高教授搭長途機返嚟香港，可能受時差影響，近日瞓得唔係咁好，甚至有啲脾氣，所以只能臨時缺席。高太致辭時亦有感而發，話自己成日要「招呼」高教授，初時都仲覺得容易，依家壓力愈嚟愈大同辛苦，聽到人心都痛埋。中秋節在即，希望高太完成晒活動可以同丈夫開開心心咁過節啦，話晒都係人月雙圓嘅日子嘛！
好多人因為高教授而認識阿茲海默症（即係老人癡呆症），高太喺唔同場合呼籲社會關注阿茲海默症患者同埋佢哋照顧者嘅需要，所以亦變咗呢個病嘅半個代言人。