教育永遠有改善空間

范太認為每名市民都會有自己意見，老中青三代市民嘅意見未必一樣，希望政府多啲透過唔同嘅諮詢團體聽取民意，市民嘅意見同希望未必可以即時滿足，但唔代表永遠唔可以達成。佢又提到政府嘅基本責任就係聽取民意，但市民亦要自己努力爭取，唔可以一味靠政府。

曾經做過教統會主席嘅范太仲好感慨咁話，每當社會出現問題，大眾都會歸咎於教育做得唔好，佢認為教育永遠都有改善同進步嘅空間，就以小班教學為例，佢一向好支持小班教學，但政府就永遠好似唔想做咁，佢自己都唔明點解。佢好無奈咁話：「總之希望表達咗意見之後有人聽啦！」嗱！教育局局長孫明揚收唔收到呀？

喺政策方面，政府最重要係唔好與民爭利，民間民企做到嘅，政府就唔好爭住做。不過佢強調，香港依家冇咁嘅情況，亦同依家嘅房地產市場冇關。除咗同學生分享自己對「政府」呢個概念嘅理解之外，范太仲贈咗四句箴言畀年輕人，就係：「我嘅根喺香港，我嘅生活喺珠三角，我嘅國家係中華人民共和國，我嘅機會喺全世界每一角落。」

鼓勵年輕人考政務官

范太話香港同內地嘅合作交流愈嚟愈頻密，日後建成高鐵之後，由香港去廣州嘅時間大為縮短，所以年輕人嘅眼光要放遠一啲，內地係一個十幾億人嘅龐大市場，十分一已經多過香港嘅總人口。總括而言，佢希望年輕人記得香港係根、祖國係本，進步嘅同時唔好忘本，加上與人為善，關心身邊人，咁就無往而不利嘞。

佢仲自爆以前試過投考政務官，不過失敗咗，佢希望對公共政策有意見嘅年輕人投考政務官或做議員，到時佢哋嘅構思就可直接入到政府。今日係范太六十五歲生日，佢笑言最願望係可以免費去海洋公園，今日會同家人朋友食飯，唔會有特別慶祝。