添馬艦新政府總部大樓嘅工程正全速進行，以「門常開」為設計主題嘅新大樓本來定喺今日（禮拜日）「上樑」，不過呢一日卻唔多吉利，唔少風水師都話係破日，不利上樑喎！唔知係咪咁點醒咗特區政府，呢個「上樑」工程亦忽然押後，聞說改咗喺十月第一個禮拜做。
新大樓嘅東翼同西翼已經成幢矗立咗喺添馬艦，只差頂部橫樑就構成一個「門」字。尋日我哋再打探時發現，原來工程已靜雞雞押後咗，聞說工程押後到十月初進行，為免影響交通，多數都喺禮拜日做，換言之即是十月三號或者十號做。
不過我哋再翻查通勝，發現十月三號忌作樑，即係都唔係好日，反而十號就啱嘞，無論上樑、豎柱、拆卸或者動土皆宜。雖然我哋唔鼓吹迷信，不過為求心安，都係謹慎為上好啲。