退休係人生嘅一個階段，前經濟發展及勞工局局長葉澍堃（Stephen）已經退休三年幾，尋日出席一個強積金講座時，就向準備退休嘅人士教路，話要退休生活多姿多采，就要及早安排退休計劃，首先供滿層樓，無後顧之憂；其次就係準備好子女教育開支，仲話千祈唔好旨意仔女供養父母喎。
有人話退休有三項條件，要有老本、老伴同老友，Stephen就認為有「老本」最重要，搞掂層樓同子女教育開支後，仲要識得投資，乜都係「低買高賣」先有錢賺，佢搞爛gag話：「千祈唔好高買，犯法㗎！」Stephen有老本，又有老伴，咁老友呢？佢坦言呢個世界好現實，以前做官好多人同你做朋友，退休後就少咗好多，但亦認清邊啲係真正老友。佢又話，鍾意飲酒嘅人可以識多啲酒肉朋友，鍾意打麻雀就識多啲雀友。
佢退休後除咗幫「小母牛」揸旗籌款外，仲做埋馬會大董，更因為識飲識食變身「新食神」，退休生活認真豐富。