本文重點
「星之子」陳易希入咗科大已經四年，佢當年讀完中五就畀科技大學破格取錄，升讀電子及計算機工程系，本來只需讀一年預備班加三年學士課程就大學畢業，但係最新消息係佢要讀多一個學期先至畢業。唔好以為星之子成績唔好，聽講佢成績唔錯，只係喺科大時成日都要參加比賽同做研究，加上佢想讀多啲副修科目充實自己，所以先要讀多半年。即使係咁，比起同齡學生，佢都早咗半年大學畢業。
科大開放日賣口乖
星之子最近嘅搞作係做「飛人」，全力以赴參加十月喺西九直升機場舉行嘅全港首個飛行大賽。據聞今次比賽有四十幾隊人馬入圍參賽，要自製各種創意飛行器，由離海面六米高嘅跑道助跑，振翅一飛衝落維港，星之子依家忙於整架飛得又遠又耐嘅飛行器參賽，既可以學以致用，又可以發揮創意。
尋日科大舉行開放日，星之子都暫時擺低工作嚟演講，期間大賣口乖多謝科大破格取錄佢，又畀咁多彈性同空間佢去比賽同做研究，佢先有個咁精彩充實嘅大學生活。至於大學畢業之後何去何從，佢話暫時未決定，但多數會繼續做研究，發揮專長，大家不妨拭目以待。