副局政助表現未獲好評，竟然冇人要減薪，全城噓爆之下，有副局私下呻到樹葉都落埋，皆因佢哋嘅表現同跟咗乜嘢老細有好大關係，好似教育局嘅陳維安同食物及衞生局嘅梁卓偉，一個跟到「保母型」局長孫明揚，有人湊又有人教；一個就跟咗個「冇影型」局長周一鑊，焗住頂硬上，反而有表現。但係跟咗有好嘢必「親力親為」嘅環境局局長邱騰華同民政事務局局長曾德成，副局冇孭鑊已經好彩喇！
呢位副局話，梁卓偉、陳維安彈出，除咗個人因素，更大原因係入局時抽到支好籤，好多發揮機會。又係嘅，好似周一鑊呢種「隱形」高官，菲律賓慘劇發生以嚟，佢施施然放完長假冇耐，轉個頭又要放十日假，副局惟有頂上。
至於邱騰華，據講係「攬權型」，自己能力有限，好似慳電膽、停車熄匙呢啲政策都搞到一鑊粥，卻唔肯放手畀下屬做，佢個副局潘潔上任兩年孭過乜嘢重頭項目？想表現都難啦。民政事務局嘅副局許曉暉都唔易做，據講德成局長屬於「卸膊型」，去立法會受靶咪許曉暉囉，嘻嘻哈哈嘅社團酒會，德成局長多數親征；即使同議員聯絡，德成局長專揀同建制派自己友打關係，同反對派泛民溝通，又係留畀許曉暉。所以話，打工仔係「發圍」定「發霉」，同老細好有關係o架。