抗戰老兵 慶過辣雞

日本喺釣魚島海域非法扣留中國漁船船長，加上尋日係九一八事件七十九周年紀念日，內地多個城市同本港都有唔少市民遊行，或去日本大使館、領事館抗議，民間慶合合，官方就冷冰冰。政制及內地事務局局長林瑞麟尋日出席一個抗日戰爭勝利六十五周年紀念活動時，喺台上大講毋忘抗戰歷史，好似愛國情懷澎湃咁，落到台下一聽到保釣嘅提問就連聲拜拜快閃，正式阿崩叫狗、愈叫愈走，最好離隻保釣船愈遠愈好。嘴上愛國易過借火，唔怕畀人話敷衍同膚淺就得啦！

呢個名為香港各界紀念抗日勝利紀念酒會嘅活動有成二、三百人參加，唔少當年抗戰嘅老兵都有現身，講起中日喺釣魚島撞船、日方拘捕內地船長遲遲未釋放嘅事，好多人都好㷫，責怪日本欺人太甚。林公公致辭時，特別全程講普通話，由抗戰勝利、中國得享和平，繼而出現改革開放，甚至一國兩制保證香港發展，開創本港經濟及金融發展嘅輝煌等，東拉西扯一大篇，簡單講就係毋忘抗戰歷史，愛國亦愛港。

食署滅鼠 忽然熱心

不過，林公公喺台下就收晒口，大家本來想問吓佢對九一八紀念日同埋保釣船出海受阻嘅問題，但林公公早有準備，一於直行直過，費事回應。

本港保釣人士原本計劃呢個禮拜出海去釣魚島捍衞主權，但食物環境衞生署上禮拜忽然出招，話收到隻船有鼠患嘅投訴。食環署治鼠本領有幾高唔使多講啦，人來人往嘅鬧市都有老鼠日光日白走嚟咬遊客，呢瓣都搞唔掂，食環署竟然「熱心」、「高效率」到監察海上船隻？唔怪之得講都冇人信啦，林公公縮骨功出晒名，梗係撇為上着。