下個星期三係中秋節，係家家戶戶團圓嘅日子。尋晚見到福建同鄉、有「三劍俠」之稱嘅全國政協常委楊孫西、全國政協委員施子清同盧文端，佢哋每年都會輪住到對方屋企過中秋，今年就輪到去楊孫西嘅清水灣「白宮」豪宅，三家人三代同堂三十幾人，相信場面會好熱鬧。
施子清一提起中秋節目就好興奮，透露到楊孫西屋企外，又話福建同廣東嘅月餅好唔同，佢比較鍾意食廣東蓮蓉蛋黃月餅，仲話香港製造先至好食。
轉頭又見到中總會長蔡冠深，喺屋企七兄弟姊妹當中，佢排行第三，如果大家都身在香港，會一齊去佢屋企食飯過節，而且各人會帶一碟餸嚟開餐，但佢話太太關穎琴好少煮餸，通常會請人煮鮑魚畀大家食。
至於中總副會長「牛仔褲大王」楊釗就聲言要「還債」。佢話過去幾十年掛住為事業搏殺，忽略咗健康同家人，所以中秋節一定係返屋企陪家人喎。