外界盛傳工聯會內部出盡力游說副會長陳婉嫻出山，搶佔二○一二年立法會「超級區議會議席」，但係會長鄭耀棠早兩日就放風話唔排除自己披甲上陣，講到真係推唔郁嫻姐咁噃。
不過，嫻姐冇避嫌，繼續活躍，尋日應邀出席樂施會活動，仲玩咗一陣類似「大富翁」嘅遊戲添。呢個遊戲叫「搵食風雲」，參加者要抽籤扮演唔同角色，嫻姐抽到做跟車送貨工人，點知玩到中途竟然畀人裁員。嫻姐話，呢個遊戲好寫實，覺得現實生活中嘅打工仔好慘，仲話要捉埋煲呔曾玩，等佢體驗民間疾苦。
嫻姐話，有機會一定要將個遊戲送畀棠哥，等棠哥下次開行會時可以同煲呔曾玩吓。嫻姐交託棠哥將個遊戲帶入行會，除咗暗嘲行會班達官貴人「何不食肉糜」之外，唔通係暗示要交棒畀棠哥，等棠哥接力出選「超級區議會議席」乎？