白鴿黨原本喺新界東有三席，即劉慧卿、鄭家富同黃成智，但鄭家富盤據大埔、沙田同西貢，黃成智以北區為根據地，再加部分大埔區域，雙方一向唔啱嘴形，○八年選舉時兩邊參選團隊更互相指摘對方越區拉票，哥親弟親唔及選票親。依家鄭家富喺政改一役中退黨，而黃成智接手黨內交通事務政策，就更加唔使畀面喇。

喺政府證實收到東隧申請加價罵聲四起，政黨當然群起抽水，為一二年立法會直選儲定彈藥，其中黃成智搶閘喺朝早發採訪通知，約傳媒十一點半喺立法會記者室開記招，但可能時間太倉卒或叫座力唔夠，唔少報館都冇派人到場，電子傳媒更加基於「有大食大」原則，早早報道身兼立法會交通事務委員會副主席鄭家富嘅批評，而黃成智嘅記者會直至下晝先出到街。黃成智一心要截鄭家富胡，點知首次偷襲就出師不利。

今次過氣「兄弟」明爭暗鬥，絕非偶然事件。白鴿黨直選布陣向來採用「N＋１」政策，即由當區現任議員（N）加一名新人上陣，鄭家富退黨，白鴿黨現任新界東議員得番卿姐同黃成智，一二年應該只派三人參選，但據聞白鴿黨已經變陣，新界東特別改為「N＋２」，即係維持搶奪四個議席嘅目標，白鴿黨咁仲唔係吼住鄭家富個位？