早前喺中環置地廣場撞到周一鑊，見佢急急腳往政府總部方向行去，原來佢啱啱開完會，趕返辦公室繼續做嘢。問起近排有乜嘢搞？佢話手頭上好多嘢要跟，唔敢隨便行開喎。

流感骨灰龕留手尾

咁梗係喇，平時都畀人叫開「每周一鑊」，呢排係流感爆發高峰期，又有鬧到滿城風雨嘅骨灰龕問題，唔睇緊啲容乜易又孭鑊？若果大家咁諗就錯晒嘞！點解？事關話口未完，佢又放假嘞！政府憲報尋日公布，佢尋日開始放假，一直放到二十七日，足足十日。佢九月初喺港府處理緊菲律賓人質慘劇期間先放完長假，竟然隔無耐又放，實在放得好密喎！

咁佢先前話手頭上好多嘢要跟，究竟係咪口不對心呀？呢樣就要問佢先知，但可以肯定嘅係佢放假優游自在，卸晒啲鑊畀梁卓偉啫！不過，周一鑊都唔好偷笑住，如果放假期間佢管嘅瓣數爆大鑊，佢都好難置身事外呀！

梁卓偉頂硬上搶分

上司A字膊，變相令頂硬上嘅梁卓偉曝光率極高，今晚佢又會有出位行為。一向音樂造詣極高嘅佢，今晚會喺香港演藝學院音樂廳，出席香港醫學組織聯會嘅籌款音樂會，為喪親小孩籌款。會長勞思傑透露，梁卓偉將會同醫生合演名曲《You Raise Me Up》，而梁卓偉將會獻技，表演彈佢拿手嘅鋼琴。勞思傑又話，前會長、Jason主診醫生方道生忙到不得了，希望佢可以百忙中抽空出席音樂會。被問到現場有冇即興活動，勞思傑就話：「唔知呀！如果方醫生到場，不如請佢上台唱歌，聽講佢識唱歌，唱歌幫佢減吓壓都好！」