成身牛仔褲、恤衫打扮的李世榮，談吐爽朗，不似平常的議員助理般拘謹，二十七歲仔開口埋口「要保持心境開朗」：「成日接觸十幾二十歲嘅青少年，思想同打扮都要落番嗰個歲數，先可以『埋堆』。」他工作時接觸到的青少年，其實就是自己的縮影。
壞學生做義工上癮
讀中四時，他是「比較活躍」、常被罰企的學生，社工「出馬」帶他做義工，免他行差踏錯：「初頭好抗拒，原本放學可以去唱K、吃喝玩樂。」一次深宵探訪工作，接觸外表兇神惡煞的夜青，始感到這份幫助人的工作，極具挑戰性，而且很有意義，從此就不能自拔，積極參與。
大學畢業，個個想搵高薪好工，他曾在商界打滾，做過公關，人工優厚，兩年前寧願「搵少啲」，轉任現職。「自己想做更有意義嘅事，亦想多啲年輕人參與，唔好似我以前，浪費晒啲時間。」所以，佢絞盡腦汁注入「好玩」元素，「潮搞」社區服務，吸引年輕人注意。
他又創立名為「義連班」的青年團體，名字夠創新，有「義工‧連繫‧我們這一班」的意思。「義連班」搞活動時，會高叫「我係承連人（成年人）」等口號，感覺鬼馬。活動又多以歷奇、唱K、睇戲、旅行團等形式舉行，打破社區服務一貫沉悶感，加強「義連班」的凝聚力。
除年輕人，他亦跟進很多老街坊個案，兩年間見盡人情冷暖。印象最深是一個無家可歸的老伯，「伯伯有一晚從內地返香港搵仔女，拍好耐門都無人應，後來先知道仔女一早賣咗間屋，搬走晒」。他雖協助老伯聯絡到其子女，但兩人竟推來推去，不願接老伯回家。
最自豪賺到成功感
後來他安排老伯入住護老中心，沒想到與老伯素未謀面，一時間竟變成老伯最親的人。說到這裏，大男孩眼濕濕，感觸良多：「依家啲人好多時利字行先，成日因錢銀爭執，中間無咗一份情，如果有，其實好多問題都可化解。」
做社區服務幾乎全日候命，連陪家人、女朋友都無時間，但李世榮仍堅守信念，首先的目標，是選區議員。同期畢業的舊同學，在商界升職加薪，人工最少高他兩成，但他無打算「轉軚」，反而為現時的工作感到自豪：「我賺到更多成功感同埋滿足感。」
Stanley's Profile
姓名：李世榮
年齡：27歲
學歷：‧暨南大學行政管理學士
‧中山大學政治與公共事務管理碩士生
社會職務：
‧吉林省青年聯合會港區委員
‧新界青聯智庫召集人
‧義連班（青年團體）主席
‧馬鞍山居民服務協會副主席
‧青年民建聯委員
‧沙田區議會增選委員
‧沙田區暑期活動籌備委員會委員
‧沙田區推廣義務工作服務協調委員會委員